• 65 gerra aktibo daude munduan, eta lekualdatzeak eragiten dituzte. Jazarpenetik eta indarkeriatik ihes egiten duten pertsonak berdintasun egoeran babesten dituzten asilo-politikak behar ditugu.
• Errusiak Ukraina inbaditu ondorengo asilo-politikek erakutsi dute elkartasuna eta justizia soziala posible direla. Hala ere, erantzun bera ez da eman beste gatazka batzuetan.
• Bizi-martxa batek giza eskubideetan oinarritutako asilo-politika unibertsalak aldarrikatuko ditu “Zu bai, zu ez: asilo-eskubidea pertsona guztientzat”  lelopean.

Urriaren 17a Pobreziaren eta Bazterkeriaren aurkako Nazioarteko Eguna oroitzen da. Horregatik, Donostiako Zero Pobrezia plataformak, 16 gizarte-erakundez eta gizarte-mugimenduz osatuta, antolatutako jarduerak aurkeztu zituen. MANIFIESTUA eta KARTELA

Kolektibo honek ohartarazi zuen, egun 65 gerra aktibo daudela munduan, baita mugak irekitzeko desberdintasun larriak direla asiloa, aterpea eta babesa lortzeko. Halaber, adierazi zuen Europar Batasuneko estatuentzat “pertsona batzuen bizitzek gehiago balio dutela beste batzuenak baino”. Azaldu zuen Errusiak Ukraina inbaditu ondorengo asilo-politiken kudeaketan frogatuta geratu dela elkartasuna eta justizia soziala posible direla, “baina ez giza eskubide unibertsalen ikuspuntutik, gatazka batzuetan mugak hurbiltasun geografiko eta kulturalagatik malgutzen baitira, beste batzuetan bazterketa, indarkeria eta muga-heriotzak gertatzen diren bitartean”, salatu zuten.

Donostiako Zero Pobrezia plataformak sistema kapitalista heteropatriarkala jo zuen desberdinkerien egiturazko kausen, pobreziaren, ingurumenaren degradazioaren eta behartutako migrazioen arduraduntzat. “Urtero, milioika pertsonak ihes egin behar izaten dute beren herrialdeetatik jazarpena jasaten dutelako hainbat arrazoirengatik: arraza, erlijioa, nazionalitatea, iritzi politikoak, hondamendi ekologikoak, talde sozial jakin batekoak izatea, generoa eta sexu-orientazioa. Bai eta gerrengatik ere”, gogoratu zuten. Gainera, aitortu zuten desparekotasun horien kausak “multifaktorialak direla, eta erabaki politiko eta ekonomikoen ondorio direla, eta oinarrian dituzten agendak giza eskubideen defentsatik eta justizia sozialaren aldeko migrazio politiketatik oso urrun daudela”.

Kale-ekintza deigarria egin zuten Donostian aurtengo ekimenak eta “Zu bai, zu ez: asilo-eskubidea pertsona guztientzat”  leloa aurkezteko. Ekimen horretan, mugak kontrolatzen zituen pertsona batek pertsona batzuk pasatzen uzten zituen, eta beste batzuk, aldiz, ez. Donostiako Zero Pobrezia plataformak honako hau aldarrikatzen zuen herritarrengan hausnarketa eragiteko:

• Ongizate kolektiboa defendatzen duten, pertsona guztien giza eskubideak bermatzeko prestatuta dauden eta interes geoestrategikoetatik urrun dauden politika publikoen alde egitea.
• Ez begiratzea beste alde batera. Euskadin armak egiten dituzten 14 enpresa Alde batetik, bakearen alde mobilizatzen gara, baina, bestetik, gizarte moduan gaitzesten ditugun borroken lehen lerroetan dauden armak ekoizten ditugu.
• Haurtzarotik laguntzea trebetasun egokiak garatzen eta tresnak lortzen, pertsonak eta herriak elkarrekin modu baketsuan bizi daitezen, aniztasuna balioets dezaten eta egiturazko desparekotasunen kontzientzia izan dezaten.
• Garapenerako lankidetza-politika krisi globala gainditzeko irtenbidearen parte da.

Pobreziaren aurka pedalei eraginez

Mundu mailan, Nazioarteko egun hori dela eta ekintzak egiten dira. Estatuko Zero Pobrezia kanpaina mobilizaziorako dei horrekin bat egiten duen ekimena da, eta Euskadin 2005etik ari da ekintzak garatzen.

• Aipatutako leloarekin, Donostiako Zero Pobrezia Plataformak aldarrikapen-bizi martxa antolatu zuen urriak 23rako, igandea. Donostiako Haizearen Orrazitik abiatu zen 12:00etan, eta Boulevarderaino iritsi zen, Txita Sound System-ek girotuta.
• Gainera, urriaren 18an, asteartea, 19:30ean, Donostiako Kresala zine-klubean (Trueba zinemak), zine forum bat antolatu zuten Aki Kaurismäkiren “Le Havre” filmarekin.

“Gure munduak dituen erronka eta mehatxuen aurrean, ezin gara geldi egon, eta parte hartzera eta mobilizatzera deitzen ditugu herritarrak”, amaitu zuten.

Donostiako Zero Pobrezia Plataforma osatzen duten erakundeak dira:

BEHAR BIDASOA • CALCUTA ONDOAN • ECONOMISTAS SIN FRONTERAS • ELAN-EUSKADI • EMAÚS FUNDACIÓN SOCIAL • ENRAIZA DERECHOS • MEDICUSMUNDI GIPUZKOA • MUGARIK GABE • MUGEN GAINETIK • PROCLADE-YANAPAY • PROYDE-PROEGA FUNDAZIOA • SOS RACISMO • SETEM HEGO HAIZEA • TAU FUNDAZIOA • UNRWA EUSKADI • EUSKADIKO GGKE KOORDINAKUNDEA.